Blogs en Χείρων·Chiron

« Expand/Collapse

Dives Gallaecia

July 01, 2008
PAAU Latín xunho 2008 e exame premio extraordinario
» ‎ Dives Gallaecia

Podedes descargar dende aquí o exame de latín correspondente ás probas das PAAU de latín de xunho e tamén a proba para o premio extraordinario de bacharelato.
Aínda sen ter novas do resultados dos meus alumnos considero que ambalas dúas son conformes á cadanseu nivel.Proba de latín PAAU xunho 2008 Proba de latín premio extraordinario Bacharelato 2008
June 29, 2008
Internet en el aula - Santander
» ‎ Dives Gallaecia

Chegar á sé do Congreso, o pazo de festivales de Santander, e ver como por videoconferencia conectabamos con Madrid, onde Mara Torres (presentadora da 2) actuaba como mestra de cerimonias nas conexións simultáneas entre todas a sés, fixarse na persona que sobre o escenario reproducía as palabras do orador mediante a linguaxe para sordos, sentarse na butaca dunha sala de conferencias de tales dimensións, rodeado dunha pléiade de azafatas en negro ou verde, a verdade é que impresiona.
Así arrancaba este congreso centrado na comunidade docente non universitaria, cun presuposto de 454 millóns de euros para o período 2005/08, en palabras de F. Ríos, secretario de Estado de Telecomunicacións, quen tamén dixo que España era líder en Europa no uso das TIC, xunto co Reino Unido (cousas dos políticos...). Un congreso que se levou a cabo grazas á colaboración entre administracións (Estatal e autonómicas) e que contou tamén coa axuda do mundo da empresa.Despois que Mara nos invitase a café, comezou a primeira videoconferencia a cargo de Steve Bosniak, cofundador de Apple. Despois seguiu o filósofo J. A. Marina, que entre outras cousas comparou os resultados entre centros que aplican as TIC e os que non o fan, chegando á conclusión de que os alumnos bos levan os mesmos resultados cun sistema ou outro, pero os alumnos peores melloran moito nun entorno TIC, algo que xa experimentara eu na miña experiencia cotiá.Falou tamén do impacto da tecnoloxía dende a infancia, co interrogante de se está a cambiar o cerebro ou non. Semella que se produciu un retroceso capacidade da memoria a longo prazo, mentres que a de corto prazo goza de boa saúde. Calificou aos novos alumnos de alumnos multitarea, cunha dificultade xeralizada en manter o proceso de atención (que nos vai dicir a nós, os mestres...)Pero rematou enarbolando a bandeira das TIC contra o desánimo, ilustrándonos coa parábola dos obreiros e a catedral.Na seguinte videoconferencia, Fernando, dende Barcelona, ironizaba contra os que xa preconizaran o fin da escola primeiro co advenimento das bibliotecas públicas, logo coa radio, televisión, ordenadores e por último con internet.Falou tamén da inercia na escola, onde trala avalancha de medios e materiais as formas de ensinar e aprender non se modificaban, en resumidas contas, a máxima do "viño vello en odres novos", algo moi debatido ó longo das sesións. Concluía mentando a necesidade dunha nova narrativa para aprender, dunha nova organización dos tempos e os espazos escolares.Seguía Jordi Adell dicindo que dende a LOE, o profesor precisa dun coñecemento disciplinar, pero tamén dun coñecemento pedagóxico e un coñecemento TIC. E lanzaba a primeira das súas filípicas: demasiados cursos de ferramentas pero non do seu uso didáctico, abundando así nas teses formuladas anteriormente. Dicia tamén que "o seu Claustro era o mundo", xa non só os seus compañeiros. É outra frase para a posteridade: "un profesor cun blog non é necesariamento un profesor innovador, é un profesor cun blog". Incendiario como sempre.Falounos tamén do que é un Edupunk, concepto creado por Jim Groom, ou o lema de "faino ti mesmo", "constrúe os teus materiais", "queima os libros de texto". Non te esteas queixándo sempre da administración, dos alumnos, dos teus compañeiros (canta razón leva nisto...)Ramón Beltrán calificaba aos alumnos de "sincrónicos" fronte aos "diacrónicos", que seríamos os profesores. Dicía tamén que temos que adaptarnos, que temos a obriga de coñecer o que é o fotolog, que temos que facer cousas novas con ferramentas novas, que necesitamos menos tecnoloxía e máis pedagoxía, que necesitamos poñer a educación de moda, como a alta cociña ou o fútbol.E entón chegou o que para min foi o "crack" do congreso, Alejandro Piscitelli, un arxentino que subía ao estrado cuns imposibles pantalóns naranxas e pinta de sabio despistado, e abofé que o era. Comezou falando da xeración Einstein, desmontando así esa teoría que circula pola rede onde se quere demostrar que google nos volve estúpidos.Vivimos, dicía, nuha era de demasiadas posibilidades (algo que facilemente podemos comprobar se pensamos os medios que teñen os nosos alumnos e os que tiñamos nós), e que como docentes debemos constituírnos en operadores da transformación educativa, debemos ser mediadores.Seguiu falando dun termo moi querido entre os quironianos, como é o da "arquitectura de participación", a "xeración de contidos e relacións", a "sabiduría das multitudes", "a complexización do consumo cognitivo". Puro Chiron.Dicir tamén que todo o seu parlamento estivo ilustrado por unha presentación espectacular, con fragmentos de vídeo e debuxos animados incluídos.E nos regalou outro palabro, polo menos descoñecido para min ata agora, a "infoxicación". Calificou a erudición como o "po vello que cae dun libro nun cerebro baleiro". Aí queda iso.A verdade é que vivimos sobreinformados. Aos nosos alumnos desbórdaos tal cantidade, feito que creo cambia o noso papel tradicional de posuidores, por outro de mediadores, entrenadores, titores da información.Seguía Alejandro calificando a web 2.0 non só como repositorio de coñecementos, senón tamén como provedor de servizos e usuarios. Segundo palabro: os "prosumidores", palabro que grazas á nosa Polivalente Ana xa coñecía.Depois chegou o turno para falar da situación no terceiro mundo con respecto ás TIC, e explicou que os maiores obstáculos non eran económicos, dada a baixa xeralizada no custo destes dispositivos, senón razóns de tipo cultural, cognitivas e políticas.E concluía cos famosos "nativos dixitais", ou sexa, os nosos alumnos, que teñen hoxe en día moitas horas menos de lectura das que tivemos nós, pero moitas máis en outras actividades como a TV, videoxogos, etc, co que se fai necesaria unha reorganización epistémica.E o certo é que, como apuntaban outros ponentes, o libro é unha "especie protexida", que salva da súa efímera existencia ao que se publica na web (Olga, non deixes que Ariadna se perda no ciberespacio...). E non menos verdade é que ler en Internet require doutras pericias e que a capacidade crítica na rede está moi disminuída. Os lectores de hoxe deben coñecer e usar todos os xéneros discursivos de internet, foros, chats, comentarios... A rede é un mare incognitum, descoñecido, estenso.Na mesa redonda do venres Santos Urbina falou do ciberplaxio, da xeración "copiar e pegar" que todos coñecemos, do "rincondelvago.com" e de "monografías.com", de que o 75% dos alumnos universitarios admiten ter usado o plaxio nos seus traballos (e tamén falou dun misterioso sofware anglosaxón para detectar as falsificacións)Rosabel Roig entrou no tema dos OA, obxectos de aprendizaxe, que definiu como "calquera recurso dixital que poida ser utilizado para construír a aprendizaxe".B. Cebreiro, da USC, contounos unha incrible experiencia do uso das TIC para a educación de discapacitados graves (accidentes de tráfico, etc.). Outra vez volveu insistir sobre a idea de que os mestres xa non somos os posuidores da información, senón xestores, titores, mediadores.Sobre esa idea insistiu ao final Steve Downes, o gurú canadiense, que en liñas xerais decepcionou.E remato cunha frase que ben podería ser un lema universal no novo mundo da educación:
"O coñecemento é o único ben que medra compartíndose"
June 24, 2008
As Médulas - Arde Lucus. Hai partida!
» ‎ Dives Gallaecia

Despois das crónicas de Luis e Ana, isto é o que teño que engadir...
June 18, 2008
Internet en el Aula - Santander
» ‎ Dives Gallaecia

Acaba de saír o programa do congreso na súa modalidade presencial, onde foron admitidas as 3 ponencias que presentei xunto con vario@s centaur@s. Trátase dunha comunicación sobre a experiencia dos "2000 anos por correo", outra sobre o "Proxecto Chiron" e unha terceira sobre "Aulas virtuais: deseño de un curso de latín", onde expoño o meu traballo coa plataforma moodle.Será en Santander o sábado 28 de xuño de 10 a 11 horas, na sesión S28A2, e espero que o doctus magister e o artifex Dedàl estean conmigo no rostra de Santander.
June 17, 2008
Dormes?
» ‎ Dives Gallaecia

Mañá é o gran día. A estrea de "Dormes?", a segunda montaxe teatral do "Taller de expresión artística do MGB", montaxe á que non son alleas as "Clásicas", como podedes comprobar na súa web. Moitos dos seus intérpretes participan tamén no proxecto dos "2000 anos por correo".

A cita é no Teatro Principal da Estrada, 18 de xuño de 2008, 21:30 horas.
Os soños nunca dormenpretenden ser eternos ...
(...) as cousas poden ser o que non sonou non ser o que aparentemente son...
June 12, 2008
Novas dende Britannia
» ‎ Dives Gallaecia

Quero destacar nesta entrada dúas novas que saíron recentemente publicadas en diversos medios, e que curiosamente non vin recollidas no cada vez máis extenso Planeta de Chiron.
A primeira delas é un artigo publicado no diario El Pais, que recolle un extracto do libro "Roma y los bárbaros", de Terry Jones (Monty Python) e Alan Ereira, onde desmontan a idea de que os bárbaros eran uns salvaxes e Roma significaba a civilización, idea que calou entre nós, afirman, grazas á eficaz propaganda romana. Pode constituír esta lectura un elemento de reflexión nas nosas clases cando explicamos a expansión e conquistas de Roma. Destacaría a interpretación que fan os autores do famoso episodio de B reno e os galos no saqueo de Roma ou as desgraciadas observacións zoolóxicas de César, Estrabón e Plinio. Se pensades que vos pode ser de utilidade podedes descargalo en formato *.pdf
E a segunda é a exposición que prepara o British Museum a partir do 24 de xullo sobre o emperador Hadrián, tal e como nos contaba recentemente o diario El Mundo. Así que se alguén ten previsto viaxar a London este verán, xa ten un aliciente máis para compensar a desafortunada gastronomía local.
June 07, 2008
Cabalgamos de novo
» ‎ Dives Gallaecia

Logo de tanto ladrido, cabalgamos de novo.Porque os centauros cabalgan, non?
pd: e que despois de tanto documental vaise pegando un pouco a terminoloxía...
June 06, 2008
Ataque hacker a Chiron
» ‎ Dives Gallaecia

Estamos sendo atacados. O enderezo da nosa web leva a unha páxina de documentais da natureza que nada ten que ver co noso centauro.
Traballamos para arreglar os desperfectos. Esperamos moi pronto dar boas novas a todos os amigos de Chiron.
Mentres tanto podedes acceder aos contidos de Chiron a través de este enderezo, ou estes outros para as distintas seccións de Blogs, Wiki, Aula virtual, Reseñas, Foro, Nuntia eventaque, Chat.
June 04, 2008
PAAU Latín - Exame de setembro 2007
» ‎ Dives Gallaecia

Nestes días onde xa estamos preparando as probas da selectividade deste ano, presentamos aquí o exame coas solucións correspondente á convocatoria de setembro do ano pasado.
May 31, 2008
Gaudeamus igitur...
» ‎ Dives Gallaecia

... iuvenes dum sumus (aut eramus)O pasado mércores, no teatro Principal da Estrada, tivo lugar o acto de despedida para os alumnos de 2º de Bacharelato. Houbo palabras, agradecementos, música, baile. E fotos, moitas fotos, que un xa vai pensando en deixar o latín e facerse "freelance"...De todo isto, "MGB-Producións" fixo este vídeo.
Precaución, a súa visualización pode resultar perxudicial para a saúde emocional dos espectadores! (gran culpa de todo iso a ten Alison Krauss e a súa impresionante "The scarlet Tide")
May 26, 2008
ARDE TARRACO, FUMEA LUCUS
» ‎ Dives Gallaecia

Onte concluíron os actos da X edición das xornadas de divulgación histórica romana de Tarraco Viva, que tiveron lugar durante os días 15 a 25 deste mes de maio de 2008.
O programa, impresionante. Historia en acción: relixión e vida cotiá no campamento, loitas de gladiadores, cabalería, teatro, medicina, música, relixión, maxia, correos e vías de comunicación, ritos fúnebres, gastronomía, escritura, literatura, xogos, artesanía, caza, mitoloxía, epigrafía, lecturas eróticas, conferencias, exposicións, ciclo de cine antigo, pompa triunfal, mundo ibérico, celtibérico e grego...Punto de encontro tamén para a X xuntanza de grupos de reconstrucción histórica romana, onde se deron cita grupos de Alemaña, Tarragona, País Vasco, Numancia. Grupos que investigan, se documentan, recrean vestiario e material orixinal, cun guión didáctico que contextualiza ditas reconstruccións.
Dende a blogosfera chironiana Calíope e as voces gregas xa nolo recordaban a semana pasada. Els dies de Dèdal falaba tamén da intención do Concello de Tarragona de impulsar a creación dunha rede europea de festivais de recreación romana, tal e como recollía o diario Avui.Aquí na Gallaecia contamos con dous eventos de estas características, a "Festa do esquecemento" na Limia e o "Arde Lucus".
A primeira tivo a súa primeira edición no ano 2001, da man da asociación cultural Civitas Limicorum, e rememora todos os meses de agosto o paso do río Limia (Lethes) polo xeneral romano Décimo Xunio Bruto.
O "Arde Lucus" está organizado polo Concello de Lugo. Tiven a oportunidade de asistir na edición do ano pasado e neste ano volveremos no marco do noso proxecto dos "dous mil anos por correo".
Pero mentres en Tarraco se conta coa participación activa da universidade e de colectivos de recoñecido prestixio, ofrece teatro romano, conferencias, e todo tipo de actividades, aquí, en Lucus Augusti, a falta dun mes para comezar o evento, non hai nen sequera un programa colgado na web [www.ardelucus.com] . As novas que saen na prensa falan da volta do "comilonum" aos pés da muralla e das preocupacións dos hosteleiros locais. Iso é todo.
E que non somos capaces na Gallaecia de saír da festa-romaría-gastronómica? non pode implicar o Concello de Lugo a entidades de prestixio, como universidades ou asociacións, que axuden na súa organización? non se poden contratar representacións teatrais, ciclos de cine, conferencias sobre a antigüidade romana? non se poden montar talleres que vaian máis aló do "tiro con arco"?
Había algún representante do Concello de Lugo na reunión de Tarragona? están invitados a participar algunha desas asociacións nacionais e europeas, especialistas na recreación histórica cun mínimo de rigor? ou van seguir contratando a eses pasa-rúas que botan lume e lanzan foguetes, e que tan pouco ou nada teñen que ver co mundo romano? van seguir montando un "macellum" onde se venden todo tipo de mercadorías sen relación algunha coa antigüidade? van facer unha comellada ao pé da muralla con churrasco e empanadas? Gastronomía?, si. En Tarraco estaba KuanUm!, e había unha lista de restaurantes que ofrecían menús inspirados nas recetas do vello Apicio. E o mesmo en Sagùnt (onde, por certo, cuns medios moitísimo máis modestos son capaces de moito máis)
Non é cuestión de presuposto, é cuestión de organización, de ideas, de implicación dos distintos sectores da cultura, da universidade, dos centros de ensino, das asociación culturais, do mundo do teatro. Xa temos festa da lamprea, do lacón, do chourizo, do carneiro ao espeto, do pemento de Arnoia, do pemento de Padrón, do percebe, do mexilón, do marisco, da empanada, do pan de Cea, do pan de Neda, da bica, dos melindres, da costrada.
Fagamos cultura. Coñezamos o noso pasado. Ademais, estamos en plena "operación bikini..."
May 20, 2008
TIC, TIC, TIC
» ‎ Dives Gallaecia

Lonxe daquela onda de erotismo que nos invadía, agora son as TICs as que preparan o seu desembarco na Gallaecia.
Primeiro será o congreso de Internet en el aula, nas súas modalidades virtual e presencial, esta última nas cidades de Santander, Granada, Madrid e Barcelona entre os días 26-28 de xuño (inscrición gratuíta). Neste evento presento unha contribución que recolle o meu traballo en Moodle, e que leva por título "Aulas Virtuales: diseño de un curso de Latín (Moodle)".
Logo virá, nos días 3-4-5 de xullo na facultade de Ciencias da Educación de Santiago, o 3º encontro de Edublogs 2008 (inscrición 40€), cun máis que interesante programa que inclúe dous días de talleres (blogs, wiki, exeLearning, iniciación a Mac, Moodle, wikispaces, Joomla, etc), e onde presentarei, invitado por Lourdes Barroso, a un "Coñecido centauro 2.0".
En setembro, días 3-4-5, chega tamén a Santiago o congreso internacional "Edutec: las TIC, puente de cultura entre Europa e Iberoamérica ", cunha asombrosa cota de inscrición de 250€ e a concesión de 1-crédito-1 (10 horas).
E xa no outono chega Chiron, co curso "Chiron 2.0: Clásicas na aula", organizado por SEECGalicia dentro do marco dos cursos de PosGrao, Terceiro ciclo e Formación Continua da USC (inscrición 70€), que terá lugar no IES Xelmírez I de Santiago de Compostela na tarde do venres 21 de novembro e o sábado 22, en sesións de mañá e tarde, completándose ademais cunha segunda fase virtual ata chegar ás 100 horas.
May 18, 2008
CENTAUROS DE OURO 2008
» ‎ Dives Gallaecia

Hai agora un ano, Chiron outorgou os seus primeiros "Centauros de Ouro" a tres alumnos de Bacharelato que se distinguiran pola súa dedicación ás linguas clásicas a través dos seus respectivos blogs. E desexo de Chiron dar continuidade a este galardón simbólico para fomentar as linguas e cultura clásicas a través de Internet entre os nosos estudiantes. E volvemos facelo hoxe, día adicado a Internet.
Así, outórgase un simbólico "Centauro de ouro" aos seguintes blogs:

http://homobonusperitusdicendi.blogspot.com

de Jaume, alumno de 1º de bacharelato que cursa Latín e Grego

http://sogradargos.blogspot.com

blog colectivo sobre referentes clásicos, mantido por alumnos de 2º de bacharelato dos Institutos Violant de Casalduch (Benicàssim), Vila-Roja (Almassora) e Joanot Martorell (Elx).

Con exemplos así, todos sentímonos ilusionados en canto ao futuro das clásicas. Como hai un ano, gustaríanos que os galardonados comentaran as súas inquedanzas, as súas ilusións, a súa paixón polo mundo grecolatino, etc. Quizais contribúan con isto a espertar futuras vocacións entre compañeiros seus máis novos.
O "Centauro de ouro" enviarase aos premiados, para que poidan insertalo no seu blog. ¡Noraboa a todos! CHIRON desexa agradecervos desta maneira o voso esforzo.
May 15, 2008
DÚAS BOAS NOVAS: CÉSAR E SAGÙNT
» ‎ Dives Gallaecia

Na edición de hoxe do diario el País, podemos atopar estas dúas boas noticias, unha, o descubrimento un novo busto de César, quizais o que reproduce con maior acerto os seus rasgos físicos, e a segunda, a decisión da Generalitat valenciana de solicitar a "inexecución" da sentencia do Supremo, que obrigaba á revertir as obras realizadas polos arquitectos Grassi e Portaceli.
May 09, 2008
ITER SAGUNTINUM (a película)
» ‎ Dives Gallaecia

Hoxe colgaba este cartel dos taboleiros de anuncios do MGB. Cun público entregado e a asistencia dos protagonistas, que desfilaron pola alfombra vermella, isto foi o que vimos...
May 07, 2008
A RESPOSTA DO LOBO AO AÑO (Fedro I,1)
» ‎ Dives Gallaecia

Este é o exame que fixemos onte en clase, que ben podería corresponder á opción de tradución en verso nas xa próximas probas da selectividade 2008. Teño que dicir que os resultados deixaron moito que desexar, así que Eutropio semella unha opción máis prudente...
April 30, 2008
O NOVO BACHARELATO (ou quen descubriu América)
» ‎ Dives Gallaecia

Despois de ser aprobado onte polo Consello Escolar de Galicia o borrador do currículum do bacharelato xa só queda o trámite de seren aprobado en xuño polo Consello da Xunta.Neste novo bacharelato entra unha nova asignatura, "Ciencias para o mundo contemporáneo", con 3 horas semanais. Así, para facerlle un oco, Educación Física, que tiña 2 horas en 1º queda só con 1; Relixión, que se impartía só en 1º (2 horas), agora impartirase cunha hora en 1º e outra en 2º; Historia de España, que contaba con 4 horas en 2º, agora queda con 3, e Filosofía e Cidadanía de 1º, que tiñan 3 horas semanales quedan con 2.Onte foi día de manifestacións e folga contra este borrador, como recollen nas súas edición os diarios La Voz de Galicia e mesmo a edición de Galicia do País.Benvidas as "Ciencias para o mundo contemporáneo", pero non se poden suprimir horas de Educación Física cando o Parlamento europeo recomenda 3 horas semanais, nin tampouco de Historia ou Filosofía.É evidente. Sobra a relixión. Inconcebible nun estado laico esta situación, e máis cun goberno supostamente de esquerdas, tanto aquí na Xunta (BNG, PSOE) como en Madrid. A CIG fixo unha proposta onte no Consello Escolar para eliminar a relixión do bacharelato. UGT votou en contra (se algún socialista levantase a cabeza!) e CCOO (pronúnciese ce-ce-o-o) elexiu a cómoda abstención!. ¡Viva la izquierda militante!.Relixión en 2º de Bacharelato, coas súas horas correspondentes de alternativa, nun curso onde todos os profesores loitamos a cotió para rematar os programas, coa selectividade ad portas.E ademais esa posibilidade de "curso puente" con tres ou catro asignaturas suspensas...Semella que todo isto foi idea dunha mente privilexiada, quizais a mesma á que se lle ocurriu non hai moito que na ESO os alumnos poderían pasar con todas suspensas, cos resultados que todos coñecemos. Tivemos una alumno no noso centro que conseguiu chegar ao bacharelato (facendo un exame para adultos no que lle deberon preguntar cal era a capital de Francia e quen descubriu América), logo de suspender todas as asignaturas de todos os cursos da ESO e pasar dun a outro por "imperativo legal".Pero claro, a ESO era eso. E senón, recordade aquelo que conta a lenda que dixo un alumno..."Pero de que me vale a min saber que Napoleón descubriu América!!!"... pd: as horas de latín e grego quedan como estaban, 4 horas semanais en 1º e outras 4 en 2º. Algo terán que ver as nosas movilizacións. Supoño. E o ano que vén comeza o latín de 4º de ESO.
April 25, 2008
CHIRON EN GIJÓN
» ‎ Dives Gallaecia

Veño de pasar dous días nesta preciosa cidade cantábrica, de abrumadora oferta cultural, recibido por un sol espléndido logo de moitos días de chuvia incesante. Acudín invitado a participar nunhas xornadas organizadas polo CPR de Gijón, onde presentei a ponencia titulada "A web 2.0 na didáctica das linguas clásicas: o proxecto Chiron".Foron dúas xornadas de 3 horas cada unha onde, fronte a un auditorio de 25 entusiastas profesores de clásicas (un éxito de participación que sorprendeu mesmo a Carlos Lomas, organizador do evento), intentei dar a coñecer en primeiro lugar as posibilidades que ofrece a nova web 2.0 na didáctica das clásicas, para pasar a continuación a presentar o Proxecto Quiron, dende o seu nacemento ata as ferramentas coas que conta na actualidade. Despois de que o auditorio aguantara impasible a case hora e media que me levou facer un percorrido polas características e ferramentas que presenta a nova internet, seguimos cunha parte máis práctica, centrada na matriculación dos asistentes nos cursos da Aula Virtual de Chiron e na creación por parte de cada profesor dun curso propio. Xogamos polo tanto os dous papeis protagonistas do noso mundo educativo, fomos primeiro alumnos e despois profes. As dúas caras da mesma moeda. Así, aprendemos a introducir varios tipos de recursos educativos no curso virtual (recursos *pdf, recursos web, vídeo) e compartimos as nosas opinións no foro.

Pero houbo máis. Como sempre, deixando as máquinas e a tecnoloxía en segundo plano, que é o que se merecen (sobre todo windows, e máis aínda se falas cun MACkero convencido como Carlos...) imponse o trato humano. Creo que xa temos quen faga a versión en bable da web de Chiron, e por se fose pouco, Xosé Nel promete tamén colaboración e xogos en flash para latín.Tamen tiven a oportunidade de coñecer á Esther Castro, da Asociación Asturiana de profesores de griego y de latín, Céfiro (inmediatamente quixen subir a ligazón a Diigo pero alí topeime coa sorrinte dilixencia da nosa Polivalente Ana)E as profesoras de Santiago Menor, alumno de Avilés, déronme a oportunidade de pechar este post con este incrible rap do alfabeto (grego). Preme sobre el co botón dereito do rato para descargalo (Gardar destino como).
powered by ODEO
April 18, 2008
ITER SAGUNTINUM
» ‎ Dives Gallaecia

Ryanair, as turbulencias da meseta, Ana e Conxa, a Valentia romana, o museo da prehistoria, na casa de Ariadna en Pompeia, voda na Lonxa, a incrible historia dun francés de oído fino, barbari ad portas , jou to the bed (ou o nacemento do galenglish, pero con gheada), L`Almoina, o Almudín (pechado), mujeresí, o tranvía á Malvarrosa, o arroz da Malvarrosa, 31 cafés, o porto deportivo, veles e vents, a horchata en almoraia, Sagùnt, escribindo rustica romana con Salva, formando unha familia (romana), Ana polivalente, Hermes nas ondas, zancos, mulsum et moretum, deconstruíndo un arco romano, Plauto de novo, risas e música, cociñando con Charo, maquillaxe e cremas con Conxa, Figueres, Almendralejo, Benicàssim, pater et magister noster, Arde Lucus, Popilia Rectina na igrexa, jou to the cástel, jou shopping, de océano en océano, na cidade das ciencias unha vez máis Dylan "everything is broken", amunt Valencia!pd: non nos esquecemos do penalti de Djuckic!
April 10, 2008
VAMOS, QUE NOS VAMOS!!
» ‎ Dives Gallaecia

48 horas máis ou menos, iso é o que falta para que despegue o voo de Ryanair que nos levará a terras levantinas, seguindo a rota que nos propón este ano o noso proxecto dos "Dos mil años por correo". Alí nos esperan xa Ana e Conxa, e ata alí desprazaranse tamén o noso pater e o noso magister, dende a Lusitania e a Tarraconensis respectivamente.
Agárdanos un programa moi apretado, con visitas ao xacemento de L´Almoina e ao centro de Valentia, con paseo en tranvía ata a Malvarrosa incluído, seguindo os pasos do gran Vicent (Conxa dixit...), exposición de Pompeia no museo da Prehistoria, cidade das ciencias, etc.
E Sagùnt. Centro neurálxico de toda esta "movida" clásica, de proteica natureza, que ou ben nos aparece agrupada baixo a forma dunha web, unha asesoría divina (que luxo, aquí sería impensable unha sección do Cefore dedicada ás clásicas), unha asociación de teatro, un seminario, unha revista, ou ben disgrégase e forma, máis que un planeta, unha galaxia de bitácoras clásicas.
Aprenderemos escritura antiga da man de Salva Muñoz, regresaremos á antiga Grecia e Roma vestidos como os antigos no taller de indumentaria grega e romana, comeremos segundo as antigas receitas no taller de re coquinaria, dirixido por Charo Marco, e iluminaremos as nosas facianas xuvenís coas pocións máxicas que nos deparará o taller de cosmética, balnea et unguenta.
Tamén agarda Plauto, da man do grupo gaditano "Balbo", que nos vai ofrecer unha representación de "El Persa" no marco do restaurado Theatrum saguntinum, ultimamente en boca de todos pola tristemente célebre sentencia do tribunal supremo.
Pero antes da nosa partida teño que resaltar o gran traballo realizado polos alumnos de 1º de bacharelato no blog dos dous mil anos, coas súas entradas sobre a visita que realizamos hai un mes á cidade de Lucus Augusti. Tamén os de 2º están a piques de rematar a súa contribución sobre a romanización da Gallaecia para a wiki do proxecto.
E a tranquilidade que da saber que contamos coa protección do mesmo Hermes para a nosa viaxe.
April 08, 2008
ITINERARIOS 4º E.S.O. 2008/09
» ‎ Dives Gallaecia

Esta é a proposta de Itinerarios do MGB para o vindeiro curso, presentada no Claustro a semana pasada. Recordemos que a nova asignatura de latín de 4º contará con 3 horas de docencia e a Cultura Clásica con 2 horas, pero agora se os alumnos a collen en 3º non a poden volver coller en 4º.Vemos ao latín situado na primeira columna do Itinerario nº2, encamiñado ao bacharelato humanístico-social. Quizais deberían figurar tamén como obrigatorias as materias da primeira columna nos itinerarios 2 e 3, tal e como se fai no itinerario número 1.Fixen esa reflexión en voz alta no Claustro, sin chegar a formular unha proposta concreta, pero puiden ver que a xente non estaba pola labor. Suporía facer uns itinerarios "moi pechados". Iso foi o que me responderon. Unha vara de medir para o itinerario de "ciencias" e outra para o de "letras" e o "terminal". Tamén comentouse o novo e esperpéntico sistema de paso de 1º de Bacharelato a 2º de Bacharelato. Polo visto agora vaise poder pasar ata con 4 asignaturas suspensas e logo cursalas ao mesmo tempo que se fai 2º. Iso se o horario do centro o permite.Cabe maior despropósito¿¿ Por se non fose pouco dano a un sistema educativo que debería premiar o esforzo e o estudio, e non supeditarse ás combinacións e permutacións da sempre voluble mente do alumno (este ano estudio, este non...), agora aínda por riba vai haber discriminación por centros!!. Un alumno pode pasar de curso e acollerse a este sistema, pero outro doutro instituto non pode porque o seu horario non llo permite. Que disparate.Un premio para a insigne mente que pariu semellante falcatruada!!Ou como dicía a raíña de Alicia...."QUE LLE CORTEN A CABEZA...!!"
March 31, 2008
O ESPERTAR DO SEÑOR CARAMUXO
» ‎ Dives Gallaecia

Despois do comentario de Ana, era obrigado poñer o video que nos conta o espertar do señor Caramuxo (Mr. Winkle), que polo visto pasou moito tempo dentro da súa cuncha, e cando se quixo dar conta...
O PESO DA TIZA
» ‎ Dives Gallaecia

Teño que recoñecelo, cada día cústame máis coller unha tiza. É algo xa físico, cuestión de tacto, de sensacións, dese po branco que se pega ás mans, á roupa, dese rechinar de dentes nas freadas ao límite máis propias de motoGP, deses anacos tan pequenos que se che desfán nos dedos antes de poder escribir unha letra.
Escribir no encerado. Que nobre arte. Para aqueles privilexiados que dominen esta técnica, claro, porque eu sempre digo que isto no é como empeza (liñas rectas), senón como acaba (a beleza do trazo curvo, da letra enrugada, unha mestura das máximas de Rubens e Adolfo Domínguez)
Recordo a un dos meus primeiros mestres, un auténtico Litterator (magister ludi), Don Pepe, dotado dunha caligrafía marabillosa, máis espectacular se cabe no seu trazado no encerado, liñas rectas, maiúsculas imposibles.
O peso da tiza. Algo que as novas xeneracións recordarán con asombro, tal e como lembramos hoxe o famoso "pizarrín" do que falaban os nosos ancestros, que non era senón unha versión posta ao día das Tabulae ceratae. Ou aqueles pupitres de dúas prazas, unidos por un ferro verde e provistos dun estraño burato negro, que facía ás veces de depósito de tinta, cousa que a nós, fillos da xeneración bic, sempre nos deixaba alucinados, imaxinando que podería saír daquel tebroso abismo.
Cambiarán sen dúbida as habilidades taquigráficas, que algúns perfeccionaron ata convertirse na réplica perfecta do prodixioso Tirón. Temos que recoñecer que pasabamos a maioría das clases máis pendentes de escribir ben o que se nos dictaba que de concentrarnos na explicación pertinente. E que dicir das famosas "fichas", unha revolucionaria proposta das TIC de entón (a outra eran os fabulosos conxuntos e as súas enigmáticas propiedades de sonoros nomes latinos: bi-uní-voca, trans-itiva...), que tiñamos que facer primeiro "en sucio", para despois pasalas "a limpo". A ninguén lle parecía importar a resposta. O principal era que o escrito na ficha estivese impoluto.

A quen formaban, a quen formamos? A futuros escribanos? Debemos seguir perdendo esa cantidade inxente de tempo na aula en escribir textos ou esquemas? Debe o alumno interactuar como un mera fotocopiadora, aplicando o seu esforzo a reproducir con maior ou menor éxito o escrito xa na pizarra? É imprescindible "coller apuntes", facer que o alumno pase toda a hora escribindo cando podemos proxectalo nunha pantalla e despois colgalo nun arquivo na rede para a súa descarga?
En entradas anteriores quixen explicar as vantaxes que pode aportar un sinxelo power point na explicación de textos para tradución ou mesmo nas cuestións gramaticais. Se os temas son de civilización as posibilidades multiplícanse, coa inserción de fotografías, vídeos, ligazóns a sitios web, etc. Na sección de presentacións de Chiron colaboramos moitos profesores para poñer a disposición de todos un bo número de exemplos de todo tipo, que medra cada día, e así poder implementalas nas nosas clases.
Confeso que hoxe son un privilexiado. Imparto as miñas clases nunha aula con canón e conexión a internet. Supoño que así se debería sentir aquel magister ao que por primeira vez lle instalaron un encerado na aula. Recoñézome na ledicia que debeu sentir cando un dos seus colegas lle falou da existencia dunhas novas e maravillosas tizas de cores!
March 06, 2008
IFIXENIA EN ÁULIDE
» ‎ Dives Gallaecia

Onte acudimos, os alumnos "clásicos" do MGB, á edición 2008 do festival de teatro grecolatino de Lugo, organizada por SEECGALICIA dentro da rede de festivales da asociación PROSOPON.

Nesta ocasión os encargados de dar vida novamente aos personaxes de Eurípides foron os compoñentes do grupo vigués Arela das Artes. Prometían música de arpa en directo, pero puidemos enterarnos de que un problema coa compañía de seguros impediu a viaxe da arpa a Lugo, así que tivemos que conformarnos con música pregravada, malia que nalgún momento da representación escoitamos unha traballada polifonía dos actores, que daba perfecto acompañamento aos monólogos dos protagonistas.
Escoitamos alí a Agamenón e Menelao, ante as prediccións de Calcante, e como un enfrontamento inicial da lugar a un acordo entre irmáns, as dúbidas e a responsabilidade do rei de Micenas, o engano tramado e o arrepentimento. Logo chegaron a inocencia de Ifixenia, a "cofradía do santo reproche" (Sabina dixit) de Clitemnestra, as poderosas razóns de Estado do rei Agamenón , e o valor de Aquiles, esvaecido ante as ansias de botín dos mirmidóns. Quedou á vista de todos a misoxínia e o sometemento da muller ao home no mundo grego, que provocou algún que outro comentario entre o público. Estamos en 2008. Non todo son malas noticias no mundo educativo e na sociedade. Os cambios van calando na xente nova.
Unha representación que durou case dúas horas, excesivo para algunha, á que Morfeo non permitiu enterarse do final. Outros preferiron atronar os seus oídos cos mp3ses, ou mpcatros. A maioría tivo un comportamento impecable. Outros deixaron escapar unhas risas estúpidas nos momentos culminantes da acción.
Para min foi unha das mellores representacións de traxedias de entre todas as que levamos visto neste festival, quizais a mellor. Os actores decididos e con poderosa dicción, a iluminación perfecta, a escenografía sobria, os movementos do coro dunha plasticidade moi traballada.
Aos meus alumnos: espero os vosos comentarios e a vosa opinión persoal sobre esta representación. Fundamentados, sexan positivos ou negativos, e as críticas envoltas sempre no veo da fina ironía...
pd: podedes ver máis fotos no álbum colgado na galería do MGB.
February 28, 2008
REUNIÓN CO COORDINADOR DAS PAAU 2008
» ‎ Dives Gallaecia
Onte celebrouse en Santiago a reunión dos profesores de latín co coordinador das PAAU 2008, Eduardo López Pereira. A xuntanza tivo tres bloques ben diferenciados.
No primeiro, o coordinador fixo un repaso dos cambios producidos no modelo de proba dende o ano pasado, ano onde comezou a desempeñar o seu cargo: igualdade no valor dos textos de prosa e verso, acotación dos temas de literatura aos catro actuais e a modificación do tipo de pregunta dos latinismos e topónimos. Conclúe cuns datos estatísticos que amosan unha mellora nos resultados das probas, que se traducirían nuns 140 alumnos máis aprobados.
No segundo bloque fixo a presentación do seu renovado grupo de traballo, falando das baixas e as altas que se produciron. Causa sorpresa saber que Díaz de Bustamante, responsable do período anterior, segue a desempeñar o cargo de Vicepresidente no Grupo, ignoramos con que cometido, xa que se por algo se caracterizou o mandato de López Pereira foi precisamente por un cambio radical con respecto ao anterior, cambio ao que o actual coordinador non deixa de aludir constantemente, o que supón un rotundo xuízo de valor respecto ao traballo desenvolvido polo seu propio vicepresidente, xuízo co que coincidimos plenamente.
Cóntanos tamén que debe entregar o modelo de exame para 2008 antes do 7 de marzo, e que o motivo da reunión responde tamén a coñecer a nosa opinión respecto ao modelo enviado aos centros.
A continuación promete que no texto de verso non haberá en ningún caso máis de 5 versos, que seguirá tal e como ata agora a cuestión gramatical e que se vai ofrecer na pregunta de Literatura Latina unha dobre opción. Neste punto producíronse varias intervencións a conta da ambigüidade no enunciado da pregunta sobre os "Tipos de Retórica" incluída no modelo enviado aos centros, ao que responde que estas preguntas non serán tan concretas e ambiguas como esta, senón que buscarán unha formulación máis ampla. Tamén responde que el non foi o que fixo as probas, senón os membros do seu grupo de traballo. Falta entón coordinación? Non debería o coordinador supervisar ese modelo antes de ser enviado aos centros?
No terceiro bloque falamos xa das novidades para as probas das PAAU 2009.
- Confírmase xa a substitución da cuestión sobre a Romanización pola lectura dunha obra clásica, ben sexa orixinal, refundida ou simplemente de tema clásico.
- Con respecto á lista de topónimos vai ser unha lista de toponimia Maior, que só incluirá toponimia latina, e que se verá reducida no número de termos.
- A lista de aforismos tamén pasará de os 200 actuais a 150, para que queden uns 50 por trimestre.
- No apartado de Literatura vaise incluír un novo tema, Plauto e o Teatro Latino.
O terceiro bloque estivo dedicado a escoitar as nosas propostas e comentarios sobre o modelo de exame.
Os membros do grupo de traballo foron preguntados polos criterios que os levaron a elixir a lista de aforismos e por que nesa lista había unha cantidade excesiva de aforismos relacionados coa relixión. Contestou José Feáns dicindo que non había ningún criterio para elixilos, que unicamente se consultaban os manuais escolares. Tampouco parece haber un criterio definido na lista de toponimia.
Pregúntase tamén polos correctores das probas de latín e respóndese que os correctores son os mesmos integrantes do grupo de traballo, aos que se lles pide que sexan máis "benévolos" na súa labor.
Na miña opinión considero que estamos no bo camiño e que afortunadamente a situación anterior xa só é un recordo do pasado, malia que un mal recordo.
O cambio era necesario, apremiante, non só nas modificacións producidas no modelo de probas, senón na relación co profesorado. Saudamos dende aquí a convocatoria destas reunións, que brillaban pola súa ausencia no período anterior.
Vemos moi positiva a inclusión de Plauto nos temas de Literatura, que supón ademais unha debida resposta ás peticións dos profesores, feitas xa o ano pasado nestas mesmas reunións. Dende logo ten o complemento ideal no Festival de Teatro de Lugo organizado por SEECGalicia. Literatura viva.
Tamén me parece oportuno a inclusión dunha obra de lectura, cuestión que xa escoitáramos tamén na reunión do ano pasado. Eu fixen unha proposta para que esta lectura obrigatoria fose unha selecta dos autores incluídos no temario de Literatura, isto é, unhas páxinas de Livio e de Suetonio, algún fragmento dun discurso de Cicerón ou dalgunha outra obra súa, uns poemas escollidos de Horacio e Catulo, un libro da Eneida e unha obra de Plauto. Considero que a Literatura non se debe explicar sen ler aos autores e que estas lecturas obrigatorias van axudar moito a un mellor aproveitamento didáctico.
Na cuestión da elección de autores para traducción a miña opinión é que Eutropio merece estar aí uns anos máis, polo menos ata que se incorporen os alumnos que cursaron o novo curso de de 4º de ESO, que é cando volveremos ter alumnos con 3 anos de latín. É un autor fácil, cuxa obra abranque todos os períodos da Historia de Roma e a través de cuxos textos podemos comentar dende a fundación da Cidade, pasando pola conquista de Italia ou a romanización de Hispania.
En cambio para min Fedro está esgotado. Non da para máis, os textos se repiten unha e outra vez (mesmo no modelo de exame) e resulta excesivamente difícil para os rapaces. Podemos atopar 3 ou catro versos asequibles, pero é moi difícil para eles traducir unha fábula enteira. Que facer entón? Non parece fácil atopar un substituto, non estamos aínda preparados para Ovidio, polo que eu proporía limitar a opción exclusivamente a textos de prosa ata o curso 2010/20011, que é cando teremos xa aos antigos alumnos con 3 anos de estudio ás súas costas.
Tamén falei da cuestións dos topónimos. O exercicio, tal e como agora está plantexado, é un exercicio inútil, calquera o pode facer, mesmo se non é alumno de latín. Paréceme tamén que a toponimia cobra unha importancia excesiva nesta proba. Propuxen outro modelo de exercicio, basado na evolución fonética e semántica dos étimos latinos ao galego e castelán. Máis adiante farei unha exposición máis detallada desta idea e fareilla chegar ao coordinador, xa que en varias ocasións mostrou a súa disposición favorable a recibir propostas do profesorado.
Concluír entón que vemos moi positivas estas reunións e máis cando vemos que se atenden as suxerencias do profesorado, como foi o caso do merecido regreso de Plauto e o Teatro Latino.
February 26, 2008
TEXTOS PARA TRADUCCIÓN: EUTROPIO E FEDRO
» ‎ Dives Gallaecia

Recordo ao meu profesor de latín de aqueles desaparecidos BUPS e COUS , entrando media hora antes na aula para non deixar ningún oco no encerado que non contase alomenos con dúas ou tres tribus galas enfrontándose a ese César imperturbable que sempre acababa por reaparecer de novo logo de tres ou catro oracións subordinadas.Un exemplo do que podemos facer hoxe a partir de power point (pasando por flashspring para publicar no blog en formato flash *.swf). Se temos un canón na clase pois nos esquecemos xa da tiza, do encerado e de ter que pasarnos media hora para copiar o texto, con esa enxeñosa caligrafía coa que fomos dotados algúns ...Se queremos que os nosos alumnos poidan ter este tipo de explicacións ao seu alcance en calquera momento a exportamos como scorm dende flashspring e a insertamos como tal no noso curso moodle.
February 24, 2008
MODELO DE EXAME PAAU 2008
» ‎ Dives Gallaecia
A principios deste mes de febreiro que xa remata recibimos nos centros un correo do coordinador de Latín onde nos citaba a unha próxima reunión e ademais incluía un modelo de exame para as probas de selectividade 2008.Os textos previstos para a traducción foron os seguintes:
- un primeiro de Eutropio, de nivel apropiado e ben elixido, xa que incorpora un episodio da romanización de Hispania, en concreto as revoltas de Viriato.
- un segundo de Fedro, máis difícil para o alumno, feito habitual nos textos deste autor, pero dentro tamén do esperado (este mesmo texto foi o do exame de setembro do 2002).
A miña opinión é que Eutropio é un autor fácil para o alumno, que narra feitos capitais da historia de Roma, e que son textos facilmente relacionables cos temas explicados en clase (este por exemplo intégrase perfectamente no tema da romanización de Hispania)Fedro en cambio é un autor xa esgotado. Leva moitos anos en cartel e os párrafos que poden ser obxecto de exame repítense unha e outra vez. O cambio é necesario. Xa non da para máis.As preguntas de comentario gramatical tamén parécenme ben escollidas e con moitas cousas que comentar, sobre todo no texto de Eutropio, que presumo será a opción maioritaria do alumnado.Na pregunta de literatura o alumnos tén que falar dos "diferentes tipos de oratoria".Creo que é unha pregunta mal plantexada, polo menos eu non sei que é o que se pregunta realmente, se unha enumeración das diferentes escolas ou tendencias da oratoria (ática, rodia, asiática), se os tipos de discurso (xudicial, deliberativo, demostrativo), se a cuestión é falar da oratoria na República e na oratoria no Imperio, etc. Busquei en varios manuais escolares a ver se aparecía algo que me dese unha pista pero foi inútil. Sigo sen saber que se pregunta aquí, e coido que os alumnos tampouco poderían dar unha resposta clara a esta cuestión. Deixade os vosos comentarios se tedes algunha idea do que se tería que ter constestado nesta pregunta.Nas "cuestións de Cultura Clásica" aparecen catro:
- a primeira referida á composición de palabras, insistindo sobre o valor semántico dos prefixos verbais.
- a segunda, un exercicio de emparellar latinismos en frases
- a terceira, a de topónimos
- a cuarta, monumentos e lugares da Gallaecia romana
De estas catro cuestións vou destacar unha, por inútil. Trátase como non da cuestión dos topónimos. Fixen ademais un experimento científico con ela. Entregueille o exercicio aos meus alumnos de 1º de bacharelato e a maioría deles acertaron todas (máis da metade da clase) o os demais só fallaron unha, empregando os que máis pronto acabaron uns vinte segundos, e os últimos un minuto escaso, alumnos ademais que nunca viron este tema na clase. Estou seguro de que se facemos esta proba con alumnos de ciencias os resultados son similares.A labor do coordinador tampouco axuda. Estivo un ano para corrixir unha lista defectuosa, e a que entrega este ano inclúe unha descoñecida "Cotobada", que logo desapareceu, e dúas "Chantadas", que aí seguen (e seguirán...). E todo isto sen a mínima bibliografía ou comentario que sexa de axuda para o profesor. Estimo que a toponimia é un campo léxico importante á hora de estudiar á evolución do latín ao galego e castelán, pero existen outros moitos campos igualmente interesantes. Creo que sería máis aproveitable didácticamente e máis valioso para o alumno un exercicio onde, manexando unhas cantas regras fundamentais de evolución fonética, puidese deducir a evolución sufrida nuns determinados étimos latinos no seu paso ao galego e castelán, onde tamén se puidesen incluír cuestións do tipo "Dime que cultismo e que palabra patrimonial atopamos no galego e castelán a partir deste étimo latino", etc.En fin, que teremos topónimos un ano máis, pero espero que sexa o último. Para axudar nesta tares podedes descargar a lista de topónimos 2008 comentada, obra do meu comes Benigno Riveiro Arjones, a quen dende aquí quero agradecer o seu traballo.E por último saudamos a incorporación de Fernando Lillo ao grupo de traballo de Latín. Non temos dúbida de que pronto sentiremos a súa presenza e a súa dedicación. Tamén pode axudar o recente revés electoral de López Pereira nas eleccións á directiva de SEECGalicia. Así terá máis tempo para dedicarlle á coordinación e posta en marcha deste novo equipo.
February 20, 2008
FLASH EN BLOGGER
» ‎ Dives Gallaecia

Un proceso un tanto laborioso para chegar ata este resultado. Elaboramos unha presentación en power point, pasámola a *.swf con flash spring, como xa explicamos nunha entrada anterior, aloxamos o arquivo nun servidor e inserimos este código html:(sen asteriscos)

Deixo aí a terceira declinación como exemplo.
February 11, 2008
UN NOVO CHIRON
» ‎ Dives Gallaecia

Xa pasaron dous anos dende a famosa proposta de Carlos e cada vez falta menos para que veña outro verán que recorde a aquel do 2006, onde, unha vez superada a sorpresa inicial perante as asombrosas destrezas de "copiar e pegar" que para nós tiña preparadas a astuta Circe, imitamos os costumes dos nativos britanos, sentándonos a modo de histórico conciábulo na herba de Oxford.
A verdade e que o centauro non acouga nin un momento. Sempre probando novas ferramentas (agora Drupal como xestor de contidos, Vodpod como marcador social de material multimedia), incorporando novos membros...
E coas súas seccións de sempre pero con moitos más contidos que se engaden continuamente (materiais na wiki, ligazóns no marcador social, imaxes en flickr, presentacións en slideshare, novos blogs, etc.)
Visítanos no noso novo espazo e colabora enviando os teus materiais ou incorporando o teu blog ao planeta chironiano!
February 08, 2008
ODISEA 2008: CHEGAMOS A ÍTACA
» ‎ Dives Gallaecia

ao EIXE DO MALás ROSA, AEás NEREIDASa FICAMás ATENEASá HIDRAás MOIRASaos JAZAFELLOSa ASIMOVI Grazas a tod@s pola vosa participación
February 07, 2008
COMITIA
» ‎ Dives Gallaecia

Dende logo non se pode negar que estamos ante un ano electoral. Caucus nos USA, precampaña en España, eleccións na SEEC, eleccións en SEECGalicia o vindeiro 15 de febreiro.
Clinton/Obama, Zapatero/Rajoy, Siles/López Eire, e tamén aquí, na Gallaecia, Cecilia Criado/López Pereira. A dualidade imponse.
Con respecto ás animadas disputas xeradas en torno ás candidaturas que se presentan á Xunta directiva da SEEC, remítome ás doctae meditationes do noso xove magister.
Pero en canto aos comicios aquí en SEECGalicia, dende Dives Gallaecia véxome na obriga de pedir o voto para a candidatura de Cecilia Criado, da que formo parte como secretario.
Se queres saber quen somos ou o que pensamos do programa da candidatura rival visita o noso blog.
* ilustración: Graffitis electorais da Casa de Xulio Polibio en Pompeia.
January 28, 2008
O IMPOSIBLE RESCATE DUNHA RUÍNA
» ‎ Dives Gallaecia

Despois de ler o artigo publicado no diario El País na edición do pasado domingo e escoitar as razóns dos arquitectos que levaron a cabo a reconstrucción do teatro de Sagùnt, un xa non está tan seguro da súa opinión anterior, que calificaba esta reconstrucción de desacertada (o certo foi que cando visitei Sagùnt hai anos sorprendeume o agresivo da intervención).Agora sei por exemplo que se se levase a cabo a orde do tribunal o teatro volvería efectivamente a ser outra vez unha ruína, ¡pero unha ruína inventada, xa que o estado anterior procedía de varias reconstruccións efectuadas nos anos setenta!E ademais, como apunta o arquitecto Portaceli, "si se pierde el teatro de Sagunto, ¿que se gana¿ Guste o no guste es una infraestructura que ha cambiado Sagunto". E deste afirmación poden dar fe todos os colectivos culturais ligados ao recinto, e os miles de persoas que enchen a súa cavea ano tras ano. Uns deles nós, que visitaremos Sagùnt no mes de abril, representación teatral incluída (esperemos...) no marco no noso proxecto dos "Dos mil años por correo".Pode ser interesante facer chegar esta problemática aos nosos alumnos. Para facilitar esa labor podedes descargar a reportaxe en formato *.pdf dende aquí.
January 23, 2008
A PIZARRA DIXITAL DO "RATO PACO"
» ‎ Dives Gallaecia
¿3.000€ por unha pizarra dixital? Pois o "rato Paco" dende Palmeira di que por só 60€ podemos montarnos unha no noso centro. ¿Que necesitamos?
- un mando da wii
- un USB bluetooh
- un diodo LED
- un pulsador
- un pouco de cable
- un rotulador vello
- 2 pilas
- 1 resistencia
E o mellor de todo e que di que funciona, e para probalo teñen un video colgado en YouTube!
January 21, 2008
CETERUM, CENSEO ...
» ‎ Dives Gallaecia

Como un novo Catón non podo máis que unirme a ese clamor procedente da antiga Tarraconensis e que se escoita mesmo dende a lonxana Gallaecia.
Son moitas as voces que se unen contra a recente sentencia do tribunal supremo que conmina á restitución ao estado orixinal do teatro de Sagùnt antes da polémica, en na miña opinión moi desarcertada, reconstrucción do monumento.
Non vou engadir nada novo que non dixeran antes as voces gregas, a levantina Hipólita, a voz da experiencia dun xove magister de Figueres ou do noso pater da Lusitania, ecos que chegan mesmo ao xardín das Hespérides ou á lagoa Estixia, e que repite o gran Iaenus e a dulce Nausicaa, a voz de Calíope, nun canto ao carpe diem, e que arden con intensidade na chama de Vesta, baixo a atenta mirada de Hermes. Pois o dito, ceterum censeo ...
January 17, 2008
A REPÚBLICA DAS LETRAS
» ‎ Dives Gallaecia

Nace un novo blog na bárbara dives, esta vez da man de Xosé Antonio López Silva, dende un dos quizais más fermosos institutos que pode haber por estes lares, o IES Porto do Son, situado á beira da praia, na ría de Muros e Noia, emerxendo dende o verde dos piñeiros, non moi lonxe do castro de Baroña, que ben podería pasar pola famosa aldea de Ásterix e Obélix...A medio camiño entre un blog de aula e un blog de profesor, Xosé Antonio prométenos reflexións futuras que só agardan o seu momento para ver a luz. Benvido á blogosfera e esperemos poder verte pronto no planeta de Quiron.
January 09, 2008
ODISEA 2008
» ‎ Dives Gallaecia

Onte comezou o prazo de inscrición para o concurso de Cultura Clásica Odisea 2008, organizado pola Delegación Galega da SEEC.
É esta xa a terceira edición do concurso, que neste ano conta cunha novidade, a incorporación ao mesmo dos centros da comunidade valenciana, como nos contan as voces gregas e podemos ler nos soños de Hermes.
Esperamos, dende o MGB, que despois dunha navegación non exenta de perigos, consigamos chegar á nosa Ítaca, esta vez na compaña dos nosos colegas levantinos.
January 02, 2008
DE COMPRAS POR ARMILLUM
» ‎ Dives Gallaecia

Para os que sempre deixan as compras para o última día, veño de atopar unha tenda virtual de reconstrucción histórica onde podemos mercar unha variedade increíble de obxectos do mundo romano: amuletos, escudos, útiles de escritura, cerámica, cantimploras, vestidos, lámpadas, etc.
Aquí tedes este video onde aparecen algúns destes obxectos e tamén o seu creador.Por certo, armillum significa "copa para o viño", e pode aparecer tamén en proverbios do tipo ad armillum revertere/redire, co sentido de "volver aos vellos hábitos".
December 17, 2007
AB POWER POINT IN FLASH ET MOODLE
» ‎ Dives Gallaecia

Navegando polos procelosos mares do planeta de blogs de Chiron, vin dar na bitácora de Fernando Lillo, onde facía referencia a unha presentación en flash sobre as vías romanas, colgada na web do IES Santo Tomé de Freixeiro de Vigo, de grato recordo para este cronista, xa que foi aí onde aprobou as oposicións, na última década do século pasado...
Fíxeime entón que esa presentación estaba feita cun programa, flashspring, convertidor de power point a flash. Entón puxen rumbo á páxina do mesmo e isto é o que descubrín.
Este programa ten varias versións, unha que converte de power point a flash, chamada Flashspring Pro 3.0 (xenera un arquivo flash *.swf e outro index.html que contén a citada animación). Existe unha versión de pago a 199 dólares, e outra totalmente gratuíta, coas mesmas funcións e que se pode descargar dende a mesma páxina. A única diferencia é que esta última leva un pequeno logo de publicidade nos arquivos que xenera.
Outra versión do programa, de enorme utilidade para os usuarios de Moodle ou outras plataformas LMS, é a FlashSpring Ultra 2.4, que xenera, a partir dunha presentación Power Point, un paquete scorm compatible coa maioría delas. Hai unha versión de pago de 499 dólares, e outra gratuíta, coa mesma particularidade que a anterior.
Así pois descarguei ambos programas (ocupan menos de 10 megas cada un) na versión gratis total, instaleinos e comprobei o fácil que é converter arquivos *.ppt en flash, ou en paquetes scorm. Logo da instalación créase unha pequena barra de ferramentas no power point e con só darlle a un botón temos a animación feita!! Quedei sorprendido pola excelente calidade dos arquivos xerados, que respectan todas as animacións orixinais, e a súa impecable adaptación a moodle.
Todo un descubrimento para os usuarios das aulas virtuais, e, seguro, unha ferramenta de uso intensivo a partir de agora!!
December 11, 2007
A CASA DE AUGUSTO RESTAURADA
» ‎ Dives Gallaecia

Varios medios recollen a nova da restauración de catro novas salas da casa de Augusto no Palatino, e anuncian tamén a reapertura da de Livia para o ano que vén.
Así nolo contan El País, con

Blogs en Χείρων·Chiron » Dives Gallaecia

Feeds

Dives Gallaecia